သာသနာရေးနှင့်ယဉ်ကျေးမှုဝန်ကြီးဌာနက “၃၇ မင်းနတ်အက ၊ နတ်ကတော်အကနှင့် အပျိုတော်အက ဖျော်ဖြေတင်ဆက်မှုဆိုင်ရာ သမားစဉ်များ” စာတမ်းဖတ်ပွဲ အခမ်းအနားကို ယနေ့ နံနက် ၀၉၀၀နာရီ အချိန်က ပုဂံမြို့ရှိ ယွန်းပညာကောလိပ်၌ ကျင်းပရာ နိုင်ငံတော် စီမံ အုပ်ချုပ်ရေးကောင်စီ၊ ကောင်စီဝင် မန်းငြိမ်းမောင် နှင့် ဒေါ်အေးနုစိန် ၊ သာသနာရေးနှင့်ယဉ်ကျေး မှုဝန်ကြီးဌာန ပြည်ထောင်စုဝန်ကြီးဦးကိုကို၊ သာသနာရေးနှင့်ယဉ်ကျေးမှုဝန်ကြီးဌာန ဒုတိယ ဝန်ကြီး ဒေါက်တာမိုးဇော်ထွန်း နှင့် ဌာနဆိုင်ရာအသီးသီးက အရာထမ်း၊အမှုထမ်းများ၊ ယဉ်ကျေးမှု ကာကွယ်ထိန်းသိမ်းရေး ကော်မတီဝင်များ ၊ ပုဂံမြို့နှင့်ညောင်ဦးမြို့က ဒေသခံများ  တက်ရောက်ခဲ့ ကြပါသည်။

          ပထမဦးစွာ စာတမ်းဖတ်အခမ်းအနားအား နိုင်ငံတော်စီမံအုပ်ချုပ်ရေးကောင်စီ၊ ကောင်စီဝင် မန်းငြိမ်းမောင်၊ ဒေါ်အေးနုစိန်နှင့် သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးကိုကိုတို့က ဖဲကြိုးဖြတ် ဖွင့်လှစ်ပေးခဲ့ပါသည်။ 

          ၎င်းနောက် သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီးက အဖွင့် အမှာစကား ပြောကြားရာတွင် ဇာတ်သဘင်များ၊ နတ်ပွဲများတွင် နတ်အကြောင်း အတ္ထုပ္ပတ္တိကို ဖွဲ့ဆိုထားသည့် နတ်တို့နှင့် ပတ်သက်သည့် အကြောင်းအရာများကို သီဆိုတီးမှုတ်ကခုန်ရန် ရေးစပ်ထားသော သီချင်းကို နတ်ချင်းဟုခေါ်ဆိုပါကြောင်း၊ နတ်ချင်း စပ်ဆိုဟန်သည် အဲချင်း စပ်ဆိုပုံနှင့်တူပါကြောင်း၊ ဝန်ကြီး ပဒေသရာဇာသည် “ ခမောက်ကယ်မှ စိန်တောင်လေ” အစချီ မဟာဂီရိနတ်ချင်း၊ မြဝတီမင်းကြီးဦးစ၏ “ခန်းစည်းငယ်မှဝေသီလေ” အစချီ မဟာဂီရိ နတ်ချင်း တို့သည် အဲချင်းစပ်ပုံနှင့်တူသော နတ်သံဖြစ်ပါကြောင်း၊ နတ်ချင်းနှင့်နတ်အကသည် ရှေးအကျဆုံး မြန်မာ့ရိုးရာသီချင်းနှင့် ရိုးရာအကဖြစ်ပါကြောင်း၊  နတ်ချင်းများသည် ယဉ်ကျေးမှု အနုပညာနှင့် ဂီတ သီချင်းများအဖြစ် ယနေ့တိုင် တည်တံ့ပြန့်ပွားလျက်ရှိနေပါကြောင်း၊  ပျူခေတ်က စတင်ပြီး မြန်မာ့သဘင်ပညာသည် ကိုးကွယ်ယုံကြည်မှု၊ ပူဇော်ပသမှုကို အခြေခံပြီး ပေါ်ပေါက်လာခဲ့ ခြင်းဖြစ်ပါကြောင်း ၊ တီးမှုတ်သည့် တူရိယာ ၊ ပစ္စည်းသုံးစွဲမှုနှင့် တီးခတ်သည့် သံစဉ်၊ သီဆိုသည့် စာသား ၊ ကပြသည့် ဟန်ပန်အမူအရာများမှာ ကိုးကွယ်ယုံကြည်မှုကို အလေး ဂရုထားပြီး သီဆိုတီးမှုတ် ကပြ ကြသည်ကို လေ့လာသိရှိနိုင်ပါကြောင်း ၊

          သာဓကအနေဖြင့်တင်ပြရမည်ဆိုလျှင် တရုတ်မှတ်တမ်းများအရ အေဒီ ၈၀၂ မှာ ပျူယဉ်ကျေးမှု အဖွဲ့များသည် တရုတ်ဧကရာဇ်နန်းစိုက်ရာသို့ သံတမန်အဖွဲ့အဖြစ် သွားရောက်ပြီး တင်ဆက်ကပြ ခဲ့ကြပါကြောင်း ၊ တင်ဆက်ကပြခဲ့သည့်အစီအစဉ်များတွင် အဖွင့်သီချင်းအနေဖြင့် ဗုဒ္ဓမြတ်စွာဘုရား၏ ဂုဏ်တော်များကို ဖွဲ့ဆိုသီကုံး ထားသည့်သီချင်းများ ပါဝင်ခဲ့သည်ဆိုသည့် အချက်မှာ ခိုင်မာသော အထောက်အထားများဖြစ်ပါကြောင်း ၊ တစ်နည်းအားဖြင့် ကိုးကွယ် ယုံကြည်သည့် ဘာသာတရားကို ဓမ္မဂီတ ၊ ဓမ္မတေးတို့ဖြင့် ပူဇော်သည့်ဓလေ့ရှိသည်ဆိုသည့် အထောက်အထားလည်းဖြစ်ပါကြောင်း ၊ 

          ထို့အပြင် နတ်များကို ပူဇော်ပသသည့် မိရိုးဖလာဓလေ့ထုံးတမ်းများကို အခြေပြုသည့် နတ်ပွဲ သဘင်များမှာလည်း အဆို၊အက၊အတီး၊အကများနှင့် ပူဇော်ပသလေ့ရှိပါကြောင်း၊ 

          ပုဂံခေတ် “သေဉ်လည်ကြောင်မင်း” လက်ထက်မှာ ပုပ္ပါးကို ဗဟိုပြု၍ နတ်ပူဇော်ပသပွဲ များကို ခြိမ့်ခြိမ့်သဲသဲကျင်းပခဲ့သည်ကို လေ့လာသိရှိရပါကြောင်း၊ ထိုခေတ်အတွင်းမှာ “သိုးက လေး” အစချီသည့် ပုပ္ပါးနတ်တောင်ဘွဲ့လင်္ကာ စတင်ပေါ်ထွန်းခဲ့သည်ဟု ပညာရှင်များက သတ် မှတ်ခဲ့ကြပါကြောင်း ၊ ထို့ ကြောင့် ယခုစာတမ်းဖတ်ပွဲကို ပုဂံရှေးဟောင်း အမွေအနှစ်ဒေသ၌ ကျင်းပပြုလုပ်ရခြင်းမှာ လွန်စွာမှ အဓိပ္ပါယ် လေးနက်ပြည့်စုံလှပါကြောင်း ၊ ထို့အပြင် သာသနာ ရေးနှင့်ဝန်ကြီးဌာန အတွက်သာမက နိုင်ငံနှင့် လူမျိုး၏ အနုသုခုမယဉ်ကျေးမှုနှင့် မိရိုးဖလာအစဉ် အလာများအတွက် ခိုင်မာသည့်အနုပညာသမိုင်း အရင်းအမြစ်ကို ရှာဖွေတွေ့ရှိနိုင်လိမ့်မည်ဟု ယုံကြည်မျှော်လင့်မိပါကြောင်း ၊ 

          ယနေ့ ကျင်းပပြုလုပ်သည့် စာတမ်းဖတ်ပွဲမှာ  စာတမ်း ၃ စောင် တင်သွင်းကြမည်ဖြစ် ပါကြောင်း ၊    “၃၇ မင်းနတ်ကတော်အကနှင့် အပျိုတော်အကသမားစဉ် တီးကွက်တီးလက်များ” စာတမ်း ၊ “ ပွဲဦးနတ်ကတော်အကနှင့် အပျိုတော်အက၏ ကကြိုးကကွက်များကိုလေ့လာခြင်း” စာတမ်းနှင့် “ အပျိုတော်နှင့်သဘင့်အစဉ်” စာတမ်းကိုလည်းကောင်း အသီးသီးဖတ်ကြား ကြမှာ ဖြစ်ပါကြောင်း၊ စာတမ်း ဖတ် ကြားမှုများနှင့်အတူ “ နတ်ကတော်သမားစဉ် အဆို၊ အတီး၊ အကနှင့် အပျိုတော်သမားစဉ် အဆို၊ အတီး၊ အက” တို့ကိုပါ လက်တွေ့တင်ဆက်သွားမည် ဖြစ်ပါ ကြောင်း ၊ 

          သာသနာရေးနှင့် ယဉ်ကျေးမှုဝန်ကြီးဌာနသည် မတူကွဲပြားသည့် ရိုးရာယဉ်ကျေးမှု အမွေအနှစ်များ၏ ဓလေ့ထုံးတမ်းအစဉ်အလာများကို ရှာဖွေဖော်ထုတ် ထိန်းသိမ်းပြီး တိုးတက် ပြန့်ပွားစေရန် ဆောင်ရွက်လျက်ရှိသည်သာမက အမျိုးဂုဏ် ဇာတိဂုဏ် မြင့်မားရေးနှင့် ယဉ်ကျေးမှုအမွေအနှစ်များ မပျောက်ပျက်အောင် ထိန်းသိမ်းစောင့်ရှောက်ရေးတို့ကို စဉ်ဆက် မပြတ် ဆောင်ရွက်သည့် အနေ ဖြင့် “၃၇ မင်းနတ်အက၊ နတ်ကတော်အကနှင့် အပျိုတော်အက ဖျော်ဖြေတင်ဆက်မှုဆိုင်ရာ သမားစဉ်များ” စာတမ်းဖတ်ပွဲကို ကျင်းပရခြင်း ဖြစ်ပါကြောင်း ၊ 

          အဆိုပါ စာတမ်းဖတ်ပွဲကို အကြောင်းပြုပြီး ယုံကြည်ကိုးကွယ်မှုဆိုင်ရာ ၃၇ မင်း နတ်ချင်းများ၊ နတ်အကများ၊ တီးကွက်တီးလက်များနှင့် မြန်မာ့သဘင်ဖျော်ဖြေတင်ဆက်မှုဆိုင်ရာ နတ်ကတော်အက၊ အပျိုတော်အကများ၏ ကကြိုးကကွက်များ၊ တီးကွက်တီးလက်များကို အထောက်အထားမှတ်တမ်းများ အဖြစ်ကျန်ရှိစေရန်၊ ဖျော်ဖြေတင်ဆက်မှုဆိုင်ရာ ဒြပ်မဲ့ ယဉ်ကျေးမှု အမွေအနှစ်များအဖြစ် ရှာဖွေဖော်ထုတ်ထိန်းသိမ်းခြင်းကို ဆောင်ရွက်နိုင်ရန်နှင့် မြန်မာ့သဘင် အစဉ်အလာသမားစဉ်များ၏ အရေးပါမှုကို လေးစားတန်ဖိုး ထားသိရှိနိုင်စေရန် အထောက် အကူပြုနိုင်ပါကြောင်း ပြောကြားခဲ့ပါသည်။

          စာတမ်းဖတ်ပွဲတွင် အနုပညာဦးစီးဌာန၊ လေ့ကျင့်ရေးနှင့်သုတေသနဌာနခွဲမှ ညွှန်ကြားရေးမှူး ဒေါက်တာလဲ့လဲ့အောင် က “ ၃၇ မင်းနတ်ကတော်အကနှင့် အပျိုတော်အက သမားစဉ် တီးကွက်တီးလက်များ” စာတမ်းကိုလည်းကောင်း၊ အမျိုးသားယဉ်ကျေးမှုနှင့် အနုပညာ တက္ကသိုလ်(ရန်ကုန်) သဘင်ပညာဌာနမှ ပါမောက္ခ/ဌာနမှူး ဦးခိုင်ထွန်း က “ ပွဲဦးနတ်ကတော် အကနှင့် အပျိုတော်အက၏ ကကြိုးကကွက်များကို လေ့လာခြင်း” စာတမ်းကို လည်းကောင်း၊ စာတမ်းရှင်မောင်လူမွှေး(မြန်မာမှု)က “ အပျိုတော်နှင့်သဘင့်အစဉ်” စာတမ်းကိုလည်းကောင်း ဖတ်ကြားခဲ့ရာ ဆိုင်းပညာရှင် ဦးကျော်ညွန့်က သဘာပတိအဖြစ် ဆောင်ရွက်ခဲ့ပါသည်။ စာတမ်း တစ်စောင်ချင်း ဖတ်ကြားအပြီးတွင် တက်ရောက်လာကြသူများက စာတမ်းများနှင့်ပတ်သက်၍ ဆွေးနွေးမေးမြန်းကြပါသည်။ 

          ၎င်းနောက် သာသနာရေးနှင့်ယဉ်ကျေးမှုဝန်ကြီးဌာန အနုပညာဦးစီးဌာနမှ အနုပညာရှင် များက နတ်ကတော် သမားစဉ် အဆို၊အတီး၊အက ဖြင့်လည်းကောင်း ၊အပျိုတော်သမားစဉ် အဆို ၊ အက ၊အတီး ဖြင့် လည်းကောင်း ဖျော်ဖြေတင်ဆက်ကြပါသည်။ 

          ဖျော်ဖြေတင်ဆက်ပြီးနောက် နိုင်ငံတော်စီမံအုပ်ချုပ်ရေးကောင်စီ၊ ကောင်စီဝင် မန်းငြိမ်းမောင် နှင့် ဒေါ်အေးနုစိန် တို့က သဘာပတိနှင့် စာတမ်းရှင်များအား ဂုဏ်ပြု လက်ဆောင် များ အသီးသီး ပေးအပ်ခဲ့ပါသည်။             ထို့နောက် သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီးက စာတမ်း များနှင့်ပတ်သက်၍ သုံးသပ်ပြောကြားပြီး စာတမ်းဖတ်ပွဲအခမ်းအနားကို ရုပ်သိမ်းခဲ့ပါကြောင်း သတင်းရရှိပါသည်။