သာသနာရေးနှင့် ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီးသူရဦးအောင်ကိုသည် ပုဂံဒေသအားကမ္ဘာ့အမွေအနှစ် စာရင်းတင်သွင်းရေးနှင့်ပတ်သက်၍ ၂၀၁၈ခုနှစ်၊ ဇွန်လ(၂၄)ရက်နေ့မှ ဇူလိုင်လ(၄)ရက်နေ့အထိBaharainနိုင်ငံ၊ Manama မြို့၌ ကျင်းပပြုလုပ်မည့် (၄၂)ကြိမ်မြောက် ကမ္ဘာ့အမွေအနှစ်ကော်မတီညီလာခံသို့ တက်ရောက်မည့် သာသနာရေးနှင့် ယဉ်ကျေးမှုဝန်ကြီးဌာန၊ ရှေးဟောင်းသုတေသနနှင့်အမျိုးသားပြတိုက်ဦးစီးဌာနမှ ဒုတိယညွှန်ကြားရေးမှူးချုပ် ဒေါက်တာသိန်းလွင် ဦးဆောင်သောမြန်မာကိုယ်စားလှယ်အဖွဲ့အားကမ္ဘာအေးဘုရားလမ်းရှိသာသနာရေးနှင့် ယဉ်ကျေးမှုဝန်ကြီးဌာန၊ ရန်ကုန်ရုံးခွဲ၌ ယနေ့နံနက်(၁၀:၀၀)နာရီအချိန်တွင် တွေ့ဆုံ၍ အမှာစကားပြောကြားခဲ့ပါသည်။
ပြည်ထောင်စုဝန်ကြီးကကမ္ဘာ့အမွေအနှစ်ကော်မတီညီလာခံသို့ တက်ရောက်မည့် မြန်မာကိုယ်စားလှယ်အဖွဲ့အားမြန်မာနိုင်ငံမှ ပုဂံယဉ်ကျေးမှုအမွေအနှစ်ဒေသကိုကမ္ဘာ့အမွေအနှစ်စာရင်းဝင်ရောက်နိုင်ရေးအတွက် စာတွဲများကိုယခုနှစ် ဇန်နဝါရီလတွင် ပေးပို့တင်သွင်းထားပြီးဖြစ်ပါကြောင်း၊ ကမ္ဘာ့အမွေအနှစ်ဗ ဟိုဌာနမှလည်းအဆိုပါစာတွဲများကို လက်ခံပြီးပုဂံယဉ်ကျေးမှု အမွေအနှစ်ဒေသသို့ လာရောက်စစ်ဆေးမည့် ICOMOS အဖွဲ့ကိုလည်းမိတ္တူတစ်စုံကိုပေးပို့ထားပြီးဖြစ်ကြောင်း၊ထို့အပြင် ICOMOS အဖွဲ့လာရောက်စစ်ဆေးရာတွင် လိုအပ်သည့် ပုဂံယဉ်ကျေးမှုအမွေအနှစ်ဒေသရှိရှေးဟောင်းယဉ်ကျေးမှုအမွေအနှစ် သာသနိကအဆောက်အအုံများ၏ လက်ရှိဓာတ်ပုံမှတ်တမ်းများကို( JPG format at a minimum of 300 dpi resolution )ဖြင့် ထပ်မံပေးပို့ရန် အကြောင်းကြားလာသည့်အတွက်လည်းမေလအတွင်းတွင် ပြန်လည်ပေးပို့ပြီးဖြစ်ကြောင်း၊ ယခုBaharainနိုင်ငံ၊ Manama မြို့တွင် ကျင်းပမည့်(၄၂)ကြိမ်မြောက် ကမ္ဘာ့အမွေအနှစ်ညီလာခံသို့ သွားရောက်မည့် မြန်မာကိုယ်စားလှယ်အဖွဲ့အနေဖြင့် ယူနက်စကိုညွှန်ကြားရေးမှူးချုပ်၊ ညွှန်ကြားရေးမှူးများ၊ ကမ္ဘာ့အမွေအနှစ်ကော်မတီဝင်(၂၁)နိုင်ငံတို့မှ ကိုယ်စားလှယ်များနှင့်တွေ့ဆုံကာ ပုဂံဒေသအား ကမ္ဘာ့အမွေအနှစ်စာရင်း တင်သွင်းထားခြင်းနှင့်ပတ်သက်၍ မြန်မာနိုင်ငံကိုယ်စားလှယ်အနေဖြင့် မိတ်ဆက်စကားပြောကြားခြင်း၊ ပုဂံယဉ်ကျေးမှုအမွေအနှစ်ဒေသအကြောင်းကိုဖော်ပြထားသည့် Booklet ၊ Pamphlet ၊ Video Clip DVD  နှင့်နှလုံးသားထဲကပုဂံဓာတ်ပုံပြပွဲစာအုပ်များဝေငှခြင်း၊ ညီလာခံသို့ တက်ရောက်လာမည့် ယူနက်စကိုဆိုင်ရာမြန်မာအမြဲတမ်းကိုယ်စားလှယ်ဖြစ်သောပြင်သစ်နိုင်ငံဆိုင်ရာမြန်မာနိုင်ငံသံအမတ်ကြီးဦးကျော်ဇေယျ (ယူနက်စကိုမြန်မာအမြဲတမ်းကိုယ်စားလှယ်အဖွဲ့ရုံး)နှင့် ပူးပေါင်း၍ ကမ္ဘာ့အမွေအနှစ်အဖြစ် ထောက်ခံနိုင်ရေး အတွက်တွေ့ဆုံ ရှင်းလင်းဆွေးနွေးခြင်းများကိုဆောင်ရွက်ရန်လိုကြောင်း၊ မြန်မာနိုင်ငံမှ ကမ္ဘာ့အမွေအနှစ်တင်သွင်းထားသော ပုဂံယဉ်ကျေးမှုအမွေအနှစ်ဒေသ၏ ထူးခြားထင်ရှားမှုများကိုကမ္ဘာ့နိုင်ငံများမှ သတိပြုလာစေရန်ကြိုးပမ်းဆောင်ရွက်စေလိုကြောင်း၊ ကြွရောက်လာသောဧည့်သည်များအားဖိတ်ကြား၍  မြန်မာ့အမွေအနှစ်ကိုကမ္ဘာကသိရှိရန် အခွင့်အခါကောင်းတစ်ခုအဖြစ် ဆောင်ရွက်ပေးရန်လိုကြောင်း၊ မြန်မာ့ယဉ်ကျေးမှုအမွေအနှစ်ဒေသကိုကမ္ဘာ့အမွေအနှစ်အဖြစ် သတ်မှတ်ခံခဲ့ရ ပါကမြန်မာ တစ်မျိုးသားလုံးက ဂုဏ်ယူဝင့်ကြွားနိုင်ရန်အတွက် စွမ်းဆောင်ခဲ့ကြရန် မှာကြားခဲ့ကြောင်းသတင်းရရှိပါသည်